[زكي الياسري]

نحن انصار الحسين ان شاء الله .. ولا يمنعنا الارهاب .. ولا يخوفنا الموت ... ان نسعى اليه
سعيا على الرأس لا سعيا على القدم
وننادي ...
لا لا للشر ... لا للذله ...... ماشين بدربك يحسين
1
منهج واضح و الميشوفه ... اعمه و باجر مثوا نار
دربك درب العز والقوه ... ما تمشيه إلا الاحرار
يا رافع راية رفعتنه ... صرنه بمدرستك ثوار
والهيبه البينه اكسبناهه ... من صرنه الخطك انصار
مطلب عدنه ... يا مرشدنه ... سجِّلنه ابدربك ماشين
لا لا للشر ... لا للذله ...... ماشين بدربك يحسين
2
الله ابمحكم آآآياته ... ضَمَّن معنى الحب للناس
صح حرفين بكلمه نجمعن ... بس مو بالـكــَمِّ المقياس
إلحب مضمونه بافعالك ... إلحب بالناتج ينقاس
ايثار و دم و تضحِّيِّه ... و كلهن جسدهن عباس
ابن الانزع ... سيفه تصدع ....... عاد بحد سيفه صفين
لا لا للشر ... لا للذله ...... ماشين بدربك يحسين
3
مشايه احنه بدرب الغيره ... نكَصد ضنوة داحي الباب
شكَـ كَبرك يحسين و شاهد ... شوف ابعينك هالاحباب
كلهه اتصيح بصوت المنحر ... ميهمنه ارصاص الارهاب
لو ذبحونه لو فجرونه ... نبقه التاج و هم اذناب
شيعة حيدر ....... ما نتأثر ........ نبقه بحبك مجنونين
لا لا للشر ... لا للذله ...... ماشين بدربك يحسين
4
تاريخ الحريه بسيفك .... يحسين انخط من اجديد
من دمك سال الشرع الله .... ثبتت ساسات التوحيد
نهجك ميخُص بس الشيعه .... ياخذ منه ياهو يريد
فيصل بين الحق و الباطل ... واهم من حده بتحديد
سيف وقدره ..... و عِبره و عَبره ..... حافظ اركان التكوين
لا لا للشر ... لا للذله ...... ماشين بدربك يحسين
5
كل منصف يدرس للمنطق ... لازم يوصل استنتاج
لابد من يوصل يم اسمك ... ويشاهد نوره الوهَّاج
لابد يجزم راس الدنيه ... من قدسيتك لابس تاج
من حيث الفاهم يفهمهه .... دمك اسراء ومعراج!
يبقه الحاصل ... انته الفاصل ... الحبك ناجي بالدارين
لا لا للشر ... لا للذله ...... ماشين بدربك يحسين
6
بتاريخ الدنيه و دورتهه ... ما صح دم ينحر بتـَّار!
و ما صح منحور ابدم سابح ... من عنده اتخاف الاشرار
و ماصح والد قـَّدَم وِلده ... كبار إلمذبحهم وِ زغار
و لهاي الاسباب انحبك ... ونتعنالك مهما صار
يابو الاكبر ... هذا المنبر .... شاهِد بيكم متمسكين
لا لا لِلشر ... لا للذله ...... ماشين بدربك يحسين

تمت بحمد الله .. 18 / صفر / 1431
زكي الياسري النجفي