[احمد هادي الشمري]

بين المخيّم والنهر.. چلمة وعد منطيهه
بجدامي ادوس اعله الخطر.. واسكينه إلا ارويهه
...
آنه الكفيل وسيرتي .. مثل الشمس معروفه
ساقي العطاشه والگـمر .. أعمه الذي ميشوفه
ربّاني حيدر والدي .. واترعرعت بچفوفه
هو الأسد وآنه الشبل .. واستورثت معروفه
حارت بأفعالي الزلم ما وصلت الماضيهه
...
آنه الكفيل وچلمتي .. بيها لغز رباني
صلبه وابد ما تنكسر .. وامحزّمه بإيماني
عالجود خطيت الوعد .. صار الوعد عنواني
وللعلگمي غار الفرس .. والجيش ما لاگاني
سبعين الف لو گابلت وجه بوجه امحيهه
...
خليت جودي عالمتن .. واسكينه تتراوالي
يا عمي موتني العطش .. نار اشتعل دﻻلي
كل همي ارجع للخيم .. هذا اليدور ابالي
مو غالي دمي لو نزف .. والجود هو الغالي
لو دمي ينشف مو مهم كون العطاشه أسگيهه
...
بسم الله شديت العزم .. واتوكّلت للحومه
أنظر جهات العلگمي .. من كل كتر ملزومه
طبيت وأهتف يا علي .. واعلومي هيه اعلومه
لحظات واملكت النهر .. والجيش حار بيومه
گبل السبط نار العطش هيهات ما أطفيهه
....
جودي انمله واتوجهت .. من النهر لخيامي
ظليت أحارب والگلب .. يخفگ على أيتامي
ﻻ يوگع ابجودي سهم .. واتضيع كل احلامي
لسكينه يا عذر الذي .. ايبرّد چبدهه الضامي
يا ريت عيني وﻻ سهم بالجربه وايبديهه
...
عباس يا رمز الوفه .. يا بو الشرف والنخوه
مو گلب سكنه ابهالوعد .. گلب الشريعه اتروّه
لولاك ما نعرف أبد .. سر العهد والخوه
ماي الفرات وكل نهر.. ايروحن الجودك فدوه
بغير اسمك الدنيا تره ذرة طعم ما بيهه
...
أحمد هادي الشمري
07714233666