نزلت ام سيف و بيدها التليفون ( موبايل)
ام سيف: سيف حبيبي هذا ابوك يريد يحجي وياك.
سيف كام و اخذ الموبايل من امه بس بكل خطوة ياخذ خوفه يكبر. سيف دخل لغرفته و ام سيف و ابو علي بقو بلصالة.
سيف: الو
ابو سيف: هلا سيف شلونك؟
سيف: هلا بابا شلونك و شلون زهراء و حمودي؟
ابو سيف: الحمدلله كلنا بخير بس انا اريدك تسوي شي.
سيف و هوا قلق: خير بابا؟
ابو سيف: اريدك تحضر جنطتك انتة و امك و ترجعون بسرعة لهنا.
سيف طاح قلبه...يا ربي اكيد ما وافق: ليش؟ بابا احنا ما كملنا اسبوعين هنا.
ابو سيف: امك كالتلي على نياتك مال الزواج و انا رفضت رفض حاد و يا الله سرع بجيتك.
سيف حس بكل احلامه تتكسر...لا لا مستحيل ابوي هيجي يسوي!
سيف: بابا ارجوك...ارجوك افهمني و فكر بلموضوع.
ابو سيف: سيف كافي ما اريد اسمع هاذا الحجي و سوي اللي كتلك عليه.
سيف كان يريد يصرخ او بسوي اي شي بس عمره ما قل ادبه وي ابوه.
سيف: بس بابا...والله...والله ما اكدر.
ابو سيف: لا بس و لا شي انتة راح تتزوج اشواق يعني راح تتزوجها.
سيف اتخبل...يا رب..يارب..اشكرك يا الله!
ابو سيف: ههههههههههه شنو سيف حسك ضاع؟
سيف: هههههههه اخ يا بابا شنو هل مقلب ... والله طيحت كلبي بلكاع!
ابو سيف: ههههه لا لا تخاف انا اول شي ما وافقت بس بعدين كلت يا الله.. الله يوفقه.
سيف: ياربي بابا لو تعرف انا شكد فرحان هسة!
ابو سيف: شنو هاي شنو مسويتلك اشواق هل كد تحبها؟ هههههه
بلصدفة اشواق كانت مارة من يم غرفة سيف على مود تريد تروح للمطبخ و سمعت سيف يكول: بابا والله احبها...احبها...جننتني! ههههه اشواق حست بلغيرة تخترق جسمها بس هيا استغربت من حالها.
الاسئلة كانت هواية بعقل اشواق: منو هاي اللي يحبها؟ و شلون شكلها؟ و شكد عمرها؟ اكيد دمها ثقيل مثله!
استخغر الله من الشيطان الرجيم! ليش كل هل اسئلة؟ انتي ماببينج و بينه اي شي...هوا ابن عمتج... و انتي بت خاله لا اكثر و لا اقل...بس احس بشي..لا لا اكيد متوهمة...اشواق استوعبي على نفسج هاذا الاستاذ سيف ابو الاوامر و تذكرت اول ايامه عندهم...بس.. بس هوا هم سيف ابو الحنية و الضحكة الحلوة.... ياربي شنو يعني تحبيه؟ احبه! لأ لأ مستحيل و شلون؟
بس شنو هاذا الاهتمام الغريب؟
سيف طلع من الغرفة و الابتسامة شاكة الحلك و الدنيا ما سايعته و شاف اشواق واكفة بباب المطبخ و تفكر...كام يتئملها بدون ما تحس
سيف بقلبه: آه يا اشواق..توافقين عليا و لا شنو؟
اشواق حست بواحد يباوعلها و التفتت و شافت سيف و استحت و ارتبكت لان عرفت انو هوا مستغرب من وكفتها بباب المطبخ و تفكيرها العميق. دخلت للمطبخ و راحت تشرب ماي.
سيف و ام سيف اتفقو انو ام سيف تفاتح ام علي بلموضوع هذا العصر.
على الغدا سيف كان مرتبك و بس يفكر. ابوعلي انتبه له.
ابو علي: سيف اشو ما تاكل بيك شي؟
سيف: ها...لا لا خالي بس امس شوي ما نمت زين.
ام علي: تريد تروح ترتاح؟
سيف: لا لا خالة هسة اكل و اصير مثل الحصان ههههههه.
و كملو الغدا لاكن عقل سيف بقة مشغول.
الساعة صارت 5:30 العصر و ابوعلي راد يطلع للكهوا فحب ياخذ علي و سيف وياه.
سيف وافق لان اذا ضل بلبيت اكثر راح يتوتر من التفكير. و علي طبعاً وافق لان يحب الطلعات.
ام سيف استغلت هاي الفرصة على مود تحجي وي ام علي بموضوع سيف. اشواق كانت فوك بغرفتها بس شمس بلصالة و كامت راحت للغرفة بعد مازهكت من الملل. فضلن بس ام علي و ام سيف بلصالة.
التلفزيون كان مشغل بس ام علي ما كانت متابعة البرنامج.
ام سيف: نجلاء..
ام علي: هلا سحر
ام سيف: عندي موضوع وياج بس ما اعرف شلون افاتحج بيه.
ام علي: افا يا سحر انا مثل اختج اتفضلي.
ام سيف: والله انتي اكثر من اختي ..و كملت انا اريد اخطب لسيف.
ام علي: على الخير و البركة انشأ الله.
ام سيف ابتسمت: الله يخليج حبيبتي بس ما عرفتي منو البنية.
ام علي: انا متئكدة انو راح تخطبين له من احلى البنات.
ام سيف ابتسمت: ابهاي صدكتي بس البت اشواق.
ام علي تفاجئت و فرحت: والله فرحتيني و انا اعز سيف مثل ابني و اكثر بس انتي عارفة بلي تريده اشواق و احنا ما نكدر نغصب بتنا على شي.
ام سيف: ههههه لا من هاي الجهة سيف حاسب احسابه.
ام علي: هههههه شلون؟
ام سيف: شايفة بيت ابو سيف بلناصرية... راح يكعد بيه على ما يبني بيت يمه.
ام علي: والله انا افرح اذا اشواق وافقت لان اذا هيا وي سيف ما اخاف عليها بس تدرين لازم اجبرها و اخبر ابوعلي.
ام سيف: لا طبعاً لازم و على العموم مهما قررت اشواق نبقة اهل و احباب.
ام علي: طبعاً حبيبتي و انشأ الله نصير اكثر من احباب و اللي كاتبه الله يصير.
ام سيف: ايه والله كلشي قصمة و نصيب.
ام علي و ام سيف بقن يسولفن و بعدين رجعو ابو علي و سيف و علي من برة.
ابو علي, سيف, علي: السلام عليكم
ام سيف و ام علي: و عليكم السلام
ابو علي: لعد وين البنات؟
ام علي: فوك
ام سيف كانت تنضر لسيف و هيا تبتسم و سيف افتهم انو امه فاتحت ام علي بلموضوع. هوا ارتاح بس بدا الخوف من جواب اشواق يلعب براسه.
استئذن و راح للحمام (تكرمون) يسبح لان الجو كان موت حر.
اشواق طلعت من غرفتها و نزلت جوة لان الملل كتلها بغرفتها و ماعندها شي تسويه. راحت للصالة و شافت الكل مجتمع بس سيف و شمس توها نازلة. كعدو يحجون و يسولفون بس فجاةً سمعو صوت.
سيف بلحمام (تكرمون) يغني: بدي حبك شو التي ابلتي ولا ما ابلتي...بدو يحبك شو التي ابلتي ولا ما ابلتي....صوته كان كلش حلو.
علي: اكوول منو بلحمام... طلع ملحم زين ههههههههههههههههه.
و الكل ضحك على سيف و علي.
سيف ما كان يدري انو هوا كان مسموع لهل درجة بس كان يغني هل اغنية لان كان يفكر بجواب اشواق ( لو هيجي العشاق ولا بلاش هههههه).
بلصالة:
ام سيف: اكول ابو علي...صارلنا فوك الاسبوعين هنا و ما طالعين بعيد.
ابو علي: وين تروحين يا ام سيف بهل وضع.
ام سيف: ايه ادري بس بغداد اخطر من الاماكن الثانية.
ابو علي: لعد نروح لكربلاء على مود نزور الحسين و العباس و بعدها انشأالله نروح للبصرة و الناصرية و يمكن الكوت.
ام علي: ايه والله انا من زمان ما رايحة زايرة الايمة.
علي فرح على الطلعة و همينة شمس.
علي: والله ونسة من زمان ما طالعين.
ام سيف: زين يا ابو علي انشألله بنهاية هل اسبوع احنة نروح لكربلاء.
بعد عشر دقيق طلع سيف من الحمام (تكرمون) و شعرة كان مبلل و طويل شوي فطالع كلش وسيم.
راح لغرفته و بدل و رجع للصالة.
ام سيف: سيف تونه جنة نحجي على روحتنا لكربلاْ و البصرة و الناصرية و الكوت بنهاية هل اسبوع... اشرايك؟
سيف ابتسم: الله فكرة حلوة بس انا همينة اريد اروح للموصل و لكركوك و زاخو.
ام علي: انشألله من نخلص من الزيارة يصير خير
العرض الشجري