[حــــــــوراء]

ظل عبدالعزيز بمكانها من ساعات ... وهو يفكر بحاله وحياته مع سارا .. انفجارها اليوم صدمه وماكان متوقعه .. لهالدرجه سارا حامله بقلبها علي .. ليه ما صارحتنى من اول انها متضايقه .. وليه تقول انى متزوجها غصب... معقوله احد قايل لها... والحين ايش اسوي .. شلون اتصرف وهي بيت اهلها... ليه كبرت الموضوع... اكيد الكل عرف الحين بالي صار.. كيف اقابل عمي صالح بكره بالشركه.. بتكون سارا قايله له شي..ااااااه ياسارا... انا لازم اشوفك الحين لازم اكلمك ...حتى لو بيت اهلك ...
قام من مكانه وراح للسياره... اخذ جواله ودق على جوال سارا ...


بعد ماطلع محمد مع زوجته وعياله .. ظلت سارا تسولف مع اهلها ..كانت حاسه براحه نفسيه بعد اليوم الطويل الي مر عليها ... جلوسها واهلها حولها خفف الي كان فيها.. بس هالشي ما خلى الهم يروح كله من على قلبها .. دق جوالها بذاك الوقت . . ولان النغمه حقت عبدالعزيز وهي تعرفها زين وماحبت ترد ... خصوصا ان اهلها حولها
لطيفه: يمه سارا ايش فيك ما تردين
ارتبكت سارا: هاه.. لا يمه هذا واحد غلطان
سلمان: عطينى اكلمه واخليه ما يزعجك
وبهاللحظه انقطع الصوت
سارا: لا ما يحتاج خلاص سكر
سلمان وهو قايم: عن اذنكم انا طالع
لطيفه: على وين؟؟
سلمان: بمر على بندر ونروح للقهوه
لطيفه: ماعندك دوام بكره؟؟
سلمان: الا بس محاضرتى متاخره
تذكرت سارا التصميم الي عليها .. الحين جات الساعه 8 ونص... والى الحين ما سوت شئ
سارا: صبر سلمان جايه معك
لطيفه: والعشا
سارا: بتعشى بالبيت يمه
لطيفه: والي سويناه ينرمي
سلمان: بتقومين سارا والا امشي عنك
سارا: الا بقوم .. يمه مره ثانيه.. عندي شغل للجامعه لازم اسويه
لطيفه: اكلك مو عاجبنى.. من جيتى مامديتى ايدك على شي.. حتى الكيكه الي تحبينها ما اكلتى منها شي
سارا: قلت لك مو مشتهيه يمه ..
لطيفه: المهم لا تتعبين نفسك كثير.. واهتمي بصحتك اهم شي
سارا وهي تقوم: لا تحاتين يالغاليه..
وقامت لبست عبايتها ...نادتها امها وهي طالعه لسلمان الي سبقها للسياره
لطيفه: سارا
التفت سارا لامها: هلا
لطيفه: انتى ورجلك معزومين عندنا على الغدا بكره
سارا: بنحاول
لطيفه: لاتحاولين ولا شي .. تعالوا وتغدوا
سارا: بقول لعبدالعزيز وارد لك خبر
وصلها سلمان لعند البيت .. وبالطريق ما فتحوا سالفه رهف ولا شي... سارا كانت تعبانه من احداث اليوم ومالها نفس للمناقشات .. اما سلمان استانس لان سارا مافتحت له الموضوع .. ولا حب يجيب طاريه ..
نزلت سارا للبيت .. وعلى طول راحت فوق لغرفتها ...

وعند نوره الكل كان مجتمع .. بعد ما طلعوا الحريم .. عمر الي كان جالس ودحومي الصغير بحضنه .. والبنات حصه وهند ومي يلعبون بالعرايس في وسط الغرفه .. اما رهف قاعده تشوف مسلسلها الحقيقه والسراب الحلقه الاخيره .. وكل دقيقه تصرخ على البنات يسكتون ... نوره وام عمر ومنيره جالسات يسولفون...
عمر: اقول نوره ماكان ولدك صاير خشمه افطس
نوره: يوه حرام عليك .. شفت ماشالله تقول سلة سيف
منيره: هههههه أي سلة سيف نوره... والله كانه فلبينى
نوره: محتره بس
رهف: وججععععععععععععع... حصووه ان ما سكتى وهجدتى مكانك لاشيلك مع كشتك واطلعك بره... ابي اسمع مو قادره اركز
نوره: روحي غرفه ثانيه
رهف: عيالك الي يروحون ... هنيد ووجع
وترمي الخداديه حقت الكنب على هند وتجيها بوجهها... قامت هند تصيح وراحت لامها
فوزيه: ها انبسطتى الحين صيحتى البنت
رهف: احسن ... وانتى بعد مي لو سمعت همسه بطردك او اضربك
ارتبكت مي وراحت لابوها
عمر: رهف تراك زودتيها ارعبتيهم كلهم
رهف: ياعالم الحلقه الاخير ما تفهمون .. ابي اشوف ايش بيصير
قامت فوزيه وطفت التلفزيون: تبين تشوفينه .. روحي غرفه ثانيه
رهف: يمممممممه
منيره: بكره يعيدونه رهف
رهف: عندي محاضره بوقتها
فوزيه: روحي غرفه ثانيه
رهف: ابي اسمع سوالفكم
عمر: والله ماعندك سالفه تبين تركزين مع المسلسل وتسمعين سوالفنا ما تركب هذي
رهف: اووووووه خلاص بكره برجع بدري .. وما يحتاج احضر المحاضره الاخيره
فوزيه: مو كيفك غبتى كثير ومافيه الكفايه
نوره: الا لحظه اليوم ما شفت سارا ابد وينهي؟
فوزيه: حتى انا ما شفتها؟
منيره: راحت لعند بيت عمي صالح
فوزيه: ولا تمر علينا ابد
منيره: لا يمه بس اليوم تعبت بالجامعه .. وبعد ما ارتاحت نزلت وكانوا الحريم عندنا ..فراحت لعند اهلها
فوزيه: ايش فيها ؟؟
منيره: مادري والله .. داخت على البنات وطاحت
رهف: الله يمكن حامل .. بصير عمه
عمر: وانتى الحين ويش
رهف: لا مي كبرت
نوره: الله ...لو تحمل سارا وتجيب ولد يتربى مع دحومي...
منيره: ليه تتمنين عليه الشقى من الحين
نوره: انتوا ايش فيكم على ولدي
فوزيه: تركيك منهم ...
نوره: ما تشوفين يمه ايش يقولون عنه
عمر: وانتى ليه تهتمين فيهم
منيره: مو واثقه من نفسك
نوره: تراك زوديتها منور
رهف: اوف اوف الشيخه نوره ازعلت
نوره: لا ما زعلت بس صراحه سخافه
رهف: خلاص ولا يهمك يام الدحمي سكتنا
منيره: والحلقه خلصت ولا شفتيها
رهف: هاها.. ومين قال لك انى ماراح اشوفها بكره
فوزيه: غياب مافي
رهف: ييييييييييمه
فوزيه: مصمه
منيره: ما كأن تاخر الوقت كثير... بكره مدرسه وروضه عند البنات
نوره: يالله حصه خذي اختك وروحي نامي.. عشان الروضه بكره.. وانتى بعد مي
حصه: مين يسوي فراشي ماما
التفت نوره لرهف وشافتها
رهف:لالالا... الحين انا الي اسوي لهم .. اعذرينى
نوره: يعنى انا الي اقوم
فوزيه: يالله رهف قومي اختك توها والد
رهف: يمه أي توها مابقى الا اسبوع وتكمل الاربعين
نوره: طيب خلى ختامها مسك وبيضى وجهك
رهف: انا وجهي وجهه خاله
عمر: توك مسانسه وتبين سارا تحمل
رهف: لو حملت سارا بتتنفس بيت اهلها مو عندنا
نوره: افا يارهيف يعنى انا غاثتكم
منيره: خلاص انا اقوم افرش لهم
رهف: لا تسوين نفسك البنت الكريمه ...
وقامت من مكانها وهي متضايقه
رهف: يالله ياحصيص تعالى انتى واختك
فوزيه: ومي خذيها معكم
دخل عليهم سالم في وقت خروج رهف مع البنات الصغار...جلس على الكنب بتعب ...
فوزيه: ماتبي عشى يابو عمر
سالم: ايه ياليت تحطونه .. ميت جوع
فوزيه: كلها ربع ساعه بالكثير ويكون جاهز ... منور روحي للخدامه وقولى لها تجهزه
منيره: ان شاء الله يمه ...
وطلعت منيره من الغرفه ... اتلفت سالم
سالم: الا وين الباقي؟؟
نوره: رهف مع البنات تنومهم
سالم: وعبدالعزيز ومرته
عمر: الا صح وينه عزيز ما شفته اليوم الا بالشركه
فوزيه: هذا وانت اخوه الي دايم معه ماتعرف وين هو..دق عليه خله يجي يتعشى
نوره: يمكن يمه مع سارا بيت اهلها
سالم: ما اظن تونى موصل صالح لبيته ولا شفت سياره عبدالعزيز
منيره وهي داخله: يمه يبه العشى جاهز على الطاوله
وقام الكل عشان يتعشى