[حــــــــوراء]

والوضع بدى يستقر بالنسبه للكل..
سارا ومنيره كان جدولهم مثل بعض الا منيره زادت سارا بماده ... وولان سارا ماكانت تبي تضغط نفسها هالسنه وبتخلص الجامعه على راحتها مادامت متزوجه ....
رهف كل يوم تمر هنادى قبل لا تروح للجامعه .. وهناك يلتقون بنجلاء ... ويدرسون مع بعض وبالبريك يشوفون ندى لان بريكها مثل وقت بريكم .. اما افنان وسلمى لانهم نظام ساعات نادر ما يلتقون فيهم ...
اما مي كان عمر هو الي ياخذها للمدرسه ويرجعها للبيت .. ماكان يرضى ابد السواق يوديها ... الا اذا عنده اجتماع ...
سلمان لانه انهى الكوب اب حقه بدي العام ... مابقى له الا سنه ويتخرج من الجامعه ... و مطلوب منه مشروع تخرج .... فكان نظامه من البيت للجامعه .... ومن الجامعه للبيت ... بعدين يطلع ويرجع بالوقت الي يعجبه........
مها ولانها حامل والطبيب طالب منها ما تترك كثير بسبب وضعية الجنين .. طلب منها عبدالله ما تروح هالسنه المدرسه الي تشتغل فيها وترتاح الى ما تجيب البيبي ...

اليوم بيجي طلال عشان يشوف منيره ... منيره كانت محتاسه مو عارفه ايش تسوي ... راحت امس للكوفيرا عشان تقص اطراف شعرها لانه شوي طويل ويبي له تعديل ....
دخلت عليها سارا للغرفه ...
سارا: الله الله منور ايش هالعفسه .. ليه كل هالملابس على سريرك .. مابقى شي بالدولاب
منيره: سارا جيتى وجابك الله ... ايش البس قولى لي ؟؟
سارا: أي شي .. تنوره وبلوزه بعد ايش
منيره: سااااااااارا
سارا: طيب طيب... البسي التنوره السماويه
منيره: لالا هذا تطلعنى دبه وكانى برميل
سارا: طيب السودا هذي
وشالت تنوره مرميه على السرير
منيره: مجنونه انا رايحه عزا .. ليه كل هالكابه
سارا : طيب هالتنوره...
منيره وهي لازالت تدور لها عن شي بالدولاب : أي وحده
سارا: اتلفتى وشوفيها
منيره لفت وشافت سارا ماسكه تنوره قديمه
منيره: تتطنزين انتى وكرشتك
سارا: انا ادري عنك مو عاجبك شي
منيره: طيب ايش رايك بهذي
سارا: مجنونه هذي قصيره
منيره: طيب عادي
سارا: لا ما يصير هذي شوفة السنه لازم تلبسين شي طويل وساتر... الا منور ليه ما تلبسين التنوره الجينز الي شاريتها من مانجو .. مره حلوه عليك
منيره: بس هذي لابستها في الجامعه
سارا: واذا جديده وحلوه ...
منيره: رايك كذا
سارا: ايه
منيره وهي ماسكه بلوزه بكل ايد : طيب أي بلوزه البس معها هذي والا ذي
سارا: امممم كل وحده حلوه .. البسيهم انثينهم وانا اقول أي احلى وحده عليك ..
اخذت منيره البلوزتين والتنوره ودخلت الحمام ...جلست سارا على السرير تنتظرها .. طاحت عيونها على رسمه منور مابعد تنهيها .. بس كانت مره حلوه .. من جد انتى يا منور رسامه .. كانت عباره عن امواج هايجه ترتطم بصخره ... وكانها تصارعها وتحاول تتغلب عليها ... وعلى قمه الصخره في بنت واقفه وتتامل الامواج ... وشعرها طاير بالجو من شدة الهوا .. شكلها مره ضئيل بالنسبه للموجه العاليه الي كانت قريبه من الصخره ... الرسمه تعبر عن الصراع الي كان داخل منيره ايام الخطبه ... الله يا منور من جد انتى رسامه والي يقهرنى انك تنكرين هالشي وتعتبرين نفسك هالشي خرابيط بس .. لو مكانك كان فتحت لى معرض ...
طلعت منيره وقطعت افكار سارا...
منيره : ها سوير شوفي
سارا: ما كان فتحت صدرها شوي كبيره...
ينفتح الباب بقوه وتدخل رهف بكل سرعتها ...
رهف: منووور جا
تغير وجهه منيره على طول : قولى والله
رهف: ايه والله .. تعالى غرفتى بسرعه عشان تشوفينه من نافذتى ..
منيره: لا مابي
سارا: يالخبله تعالى ...
رهف: اذا ما تبين بكيفك انا بروح اشوفه
منيره: وانتى ايش لقفك
رهف:زوج اختى ابي اعرف شكله .. وبلا غيره وتعالي
وجرتها من ايدها ودخلوا غرفة رهف ....
رهف: سوير سكري النور ...
وراحوا للنافذه عشان يشوفون الخطيب...
منيره: وينه مو واضح .. هالعمر خل يروح عن قدامه عشان اشوفه
سارا: وليه مستعجله على رزقك ... مصيرك بتشبعين منه
منيره: يووووووه دخلوا ولا قدرت اشوفه
رهف: وانا بعد
ويفتح عليهم نور الغرفه ....
فوزيه: ايش عندكم ملتمين عن النافذه.. ومطفين النور
وعلى طول يلفون لامهم ووجههم احمر ...
رهف: يم..مه ... لا .. كنا
فوزيه: منيره يمه ..استعدي خطيبك جا
وشافت رهف نظره ...
فوزيه: وانتى يا رهيف بلا حركات عيال ...
وطلعت من الغرفه
سارا: يووه فشيله
منيره: من جددددددد
رهف: لا عادي ... المهم منور ايش بتلبسين
منيره باستغراب: هذي الي علي
رهف: من جدك .. يالخبله
منيره: ليه
رهف: التنوره بمقبوله بس ايش هالبلوزه ..
منيره بحيره: طيب ايش البس
رهف راحت لدولابها وطلعت بلوزه من بلايزها
رهف: البسى هذي حقتى
منيره: بس انتى ولا مره لبستيها
رهف: عادي ..انتى قايسيها واذا طلعت عليك حلوه حلال عليك ياختى
منيره: اليوم انا صايره عارضه ازياء
سارا بطنز: الي يسمعك يقول جسمك مثل اجسامهم
منيره: اوريك يالدبه هذا بدال ما ترفعين من معنوياتى وانا بحالتى هذي
سارا ورهف: هههههههههههه
رهف: معها حق منور .. انتى لو تضعفين خمسه كيلو على الاقل تطلعين ولا ملكان
سارا: ايه وتروح هالكرشه شوي ...
منيره: يالخايسات تشوفون
رهف: هههههههههه نمزح معك .. جسمك كذا تمام صدقينى .. ولا تنسين حنا اهل الخليج نحب البنات المربربات .. مو العصلات مثل الغرب
منيره: ما اظن من بعد ما طلعت لنا هالفضائيات تفكير الشباب تغير
سارا: ومن متى منيره هانم تهتم براي الشباب
رهف: من يوم ما انخطبت... اقول منيّر بلا دلع وانقلعي البسى البلوزه اشوفها عليك
منيره ما كانت سمينه ... بس فيها حقها .. يعنى مثل الاجسام السايده عندنا مو نحيفه ولا سمينه ...
منيره: طيب طيب ...

بمجلس الرجال بعد ما دخل طلال الي كان جاي لوحده ... استقبله طبعا عمر ... كان سالم موجود بالمجلس ... اقبل طلال على سالم وسلم عليه وحبه على راسه ... بعدين جلس مو عارف ايش يسوي.. حاس بنفسه غلط .. كان يحس ان سالم يشوفه بنظره يعنى ايش تبي تشوف بنتى مو كافي تخطبها .. بس هذا حقه طبعا ... استاذن سالم وطلع ... وبقى عمر يسولف معه .....
اما منيره خلاص حالتها حاله .. بعد مالبست رفعه شعرها بكلب وطاحت خصلات على جانب وجهها بشكل عفوي .. اعطاها جمال زياده على جمالها ...وحطت ملمع خفيف على شفايفها عشان يعطيهم لون .. وبعيونها كحلتها المعتاده .. يعنى شكلها اليومي ... لانه ما يصير الوحده تطلع بزينتها بشوفة السنه ... نادتها فوزيه من تحت عشان تنزل ...
منيره: خايفه مابي ادخل ...
رهف: اقول انقلعي لو كنت مكانك كان دخلت ركض مين يصير له مثل هالفرصه بالعكس وناسه ...
منيره: مالت عليك ..روحي بس .. سارونه ادخلى معي
سارا: هههههه.. وباي صفه ادخل ..
منيره: انتى مرت اخوي
الا تدخل عليهم نونيتا الخدامه ..
نونيتا: مونيرا ماما في قول انزل تحت سرعه
منيره: انتى الثانيه روحي انا فاضيه لك ...
سارا: بلا دلع منور ترى الرجال ينتظر
منيره: طيب طيب اكلتونى
ونزلوا تحت كلهم .. اول ما شافت منيره ابوها الي كان جالس بالصاله ارتبكت وحمر وجهها ...
سالم: يالله يا بنتى تاخرتى .. ادخلى وانا ابوك
فوزيه: لحظه لحظه ... انتى ايش فيك ليه رافعه شعرك كانك بالجامعه .. هات اشوف
وفتحت شعرها ...
فوزيه: ايه خليه يشوف شعر بنتى ايش حلاته .. ما تعرفين ان جمال المراءه بشعرها ..
وقامت ترتب شعر منيره بايدها .. الي كان طويل شوي ويوصل لحد نص ظهرها .. طبعا مدرجته على شكل ..سبعه.. بحيث الخصل الي قدام توصل لحد كتفها بعدين يتدرج الى نص ظهرها ...
فوزيه: كذا زين .. يالله يا بنتى
منيره بارتباك: الحين يمه ...
سالم: ايه منور .. الرجال له ربع ساعه من جا .. وهو ما جا الا عشان يشوفك
منيره: ما يصير تعطونه صورة
رهف: هههههههههههههههههههههههههااااي .. من حلاة صورك الحين .. والا تبينه يهج من البلد بحالها
منيره: اقول اسكتى احسن لك
فوزيه: رهوف عيب يا بنت .. لا منور ما يصير... خذي العصير وادخلى
منيره: ماقدر يمه ايدي ترتجف
سالم : مو لازم عصير ولا خرابيط .. بس بسرعه تراكم اخرتونا ...
منيره لفت على سارا وشافتها بنظره يعنى انقذينى .. ابتسمت لها سارا ابتسامه ولا احلى ... وتكلمت وهذي اول مره تتكلم فيها ...
سارا: منور هي تجربه .. وفرصه لك بعد عشان تشوفينه
رهف: ايه منور .. وقولى لنا رايك فيه
وراحت منيره مع ابوها للمجلس ..
منيره: يبه خلاص مابي اتزوج... مابي ادخل قولوا له يروح
سالم: منيّر لا تعصبينى يالله قدامي
فتح سالم الباب .. ودز منيره الي انصدمت يوم استوعبت ان ابوها ما دخل معها .. وشافت نفسها بوسط المجلس ..رفعت راسها وتطيح عينها بعيونه
كان يسولف بكل هدوء .. وفجاه ينفتح الباب وتدخل منه ذيك البنت الي عجبته وهي صغيره شلون بعد ما كبرت .. ومن غير شعور ما قدر يشيل عينه عنها .. ما اهتم بعمر او استحى منه .. همه يشوف هالحوريه الي ادخلت عليه ... رفعت راسها وشافه زين .. طاحت عيونها المكحله بعيونه .. وعلى طول سحرته ... هي ما قدرت تصبر وتنزل راسها على طول .. وقت التقاء العيون استمر اقل من ثانيه .. ومع كذا بهالوقت القصير قدر يرسم صورة وجهها بخياله ... من جد ايه بالجمال ..وبصوت بالموت سمعه سلمت ...عمر حاول يتدارك الموقف .. وقف وراح عند اخته .. اخذها من ايدها وجرها تجلس جنبه ...اما طلال وبصوت بعد ما قدر يرفعه اكثر رد السلام ...جلست منيره جنب اخوها بحيث يشوفه طلال جنبها .. كان شعرها طايح على وجهها مو واضح منه شي .. نزلت عيونه على تحت .. لاحظ انها عاقده ايدينها ببعض وشادتهم بقوه .. عشان تمنع الارتجاف الي مو قادره تسيطر عليه ...
طلال: شلونك منيره
سمع همهمه منها .. يعنى انا طيبه ..ولا زالت عيونها تتامل جزمتها لدرجه شك فيها .. وقام هو بعد يشوف الجزمه يمكن فيها شي ... الله يا منيره انتى بكل شي ناعمه حتى رجلك صغيره وناعمه ... عمر حب يقطع السكوت مره ثانيه
عمر: الا يا طلال قلت لى تشتغل وين
طلال انتبه من شروده : الله يسلمك انا تابع لارامكو
عمر: ماشالله يعنى شغلك بالظهران
طلال: لا حاليا انا اشتغل في حرض بس كلها كم شهر وارجع للظهران
وفي داخل نفسه يقول .. انا ما جيت اسولف عن الشغل ابي اسمع صوتها هي ابي اشوف شكلها هي .. اااه من هالشعر مو قادر اشوف شي .. وكان منيره قرت افكاره .. وبحركه ماكانت تقصدها رفعت ايدها ورجعت شعرها ورى اذنها .. وطلع له جنب وجهها واضح ... فمها واسع بس هالشي مو مشينها بالعكس .. اما خشمها كان صغير بحيث معطي شكل متناقض مع فمها .. ومع كذا اعطها جاذبيه .. وقبل لا يكمل تاملته رجعت الخصله من جديد وغطت وجهه .. انقهر منها .. لا هالشعر بخليها تقصه اول ما املك عليها ... خل اشبع من وجهها مو يحرمنى مثل الحين ...

اول ما اطلعت منيره من الصاله .. حست سارا باحد يسحبها من ايدها ... ولفت شافت رهف تجرها ...وقبل لا تفتح فمها اشرت لها رهف باصبعها يعنى اسكتى ... وانسحبوا من الصاله من غير ما تحس فوزيه .. طلعوا برى للحوش
سارا بصوت واطي: انتى وين بتاخذينى
رهف وهي ماسكه ضحكتها: ما تبين نشوف العرسان من نافذه المجلس
سارا: لا رهف ما يصير
رهف: بكيفك
سارا: انقلعي صدقتى بجي معك طبعا ...
كانت نافذه المجلس مقابله واجهه البيت .. يعنى الي توه داخل للفيلا تكون النافذه قدامه ...وتوهم رايحين قدام البيت .. الا ينفتح الباب ويدخل عبدالعزيز ... ارتبكوا الثنتين ووقفوا في مكانهم ...
عبدالعزيز باستغراب وهو يدخل مفتاح السياره بجيبه : سارا رهف!! ايش تسون هنا؟؟
.......