للرادود الخالد حمزة الكبير

آه ياحمزة الزغير!!!
أرد أسالك ليش أي رادود يقره . يقره حيل يذب صوته يخلص ويطلع تقاعد !!
وانت من خمسين عام ولسه خالد
انت صح إنزلت (بنار بدليلي) بالمقام
بس مقامك يبقى صاعد
وانت من خمسين عام ولسه خالد
آه ياحمزة الزغير !!
يادفو صوت العقيلة لمن تحجي ويّه أهلهه
(ياهلي شصار شصار ماتخبروني )
وين حارس خيمتي .. وين عزي وهيبتي
وين صوتك ها يحمزة
صرت من أشتاك اسمعك مثل أم إتدوّر وماكو طفلهه
يمن بحّة صوتك تأمن الدنيا بدنيا مابيهه أمان
يمن (آه يحسين ومصابة ) بلهاتك بعد ماوصلت إشفافك تنزل الأملاك تلطم
وإزدحام تدوّر ومامش مجان
آه ياحمزة الزغيّر !!
مدري كلبي إعليك ذابل مدري ذابل على صوتك مدري علماكو يذوب
وأنت تعرف بالمراجع كبل ماترحل توصّي
وأنت مرجع للقصيدة ليش ماوصيت واحد بدل عن صوتك ينوب
وأنت هم مثلي تتوب
وانت هم مثل البشر عندك إذنوب
ليش تقره ؟؟
(شلون بيّه وثكل وزن حسابي
وإنمله من المعاصي كتابي)
وأنت حمزة وازنت دنيا بقصيدة
(يمه ذكريني) نشيد أصبحت لأحلام الشباب
(كلي يلميمون) من إقريتهه مو دمع عينك
دمع كلبك نزل من ذاك المصاب
(أهز مهدك ) فطرّت كلب السمعهه
وحتى جبرائيل يمك يبجي ويدك على راسه
كتله ليش؟؟
كال من صوتك أريد اكسب ثواب
آه ياحمزة الزغير!!!
فجلي كبرك روحي مليانه ذنب
رايد أتوسد بكترك
أرد أشم ذيج القصيدة ..
لا .. أشم هاي القصيدة
حتى من يلفيني منكر يسمعك تقره بروازين الكبر
(جابر يجابر) يشرد وترتجف ايده
آه ياحمزة الزغير!!!
شكثر واهس عندي اسمعك
وآنه روحي ضيكه حيل
بس الك تصبح طويلة
وهاي الألقاب العظيمة على أغلبهم متاهه
وبس الك كلش جميلة
وبأختصار..
كون أكتب على كبرك
ياجناب وياسماحة ويافضيلة ... حمزة الزغير)

للشـــــــاعر المبدع شاعر كربلاء :: فراس الأسدي الأسدي ::

للأمــــــــــــــانه منقوله الأبيات