دللول الولد يبني دللول
 

دللول الولد يبني دللول
ليش آنه سبيه وانت مكتول

دللولك يـ يُمّه .. اتطگ بالعظام
بعدك ستّشر لو كمّلت عام ؟
حضني شبيه حتى بگبرك تنام
آنه ومو عدوك ساكن الچول

اگابل مهدك واشتم دمه وهيل
واهزّنه لحد ما يخلص الليل
دللولك ثگيله تريد چم حيل
وأنه يوليدي لا قوه ولا حُول

دللول الولد .. يا شمعة الدار
كونك هسه تلعب وي الزغار
اجي لگبرك واهز بچفي الحجار
واگولن لا چبير ولا هُوْ معلول

دللول الولد لتصدگ انساك
وانت بكل مكان .. اهنانه وهناك
الله وياك اگول .. ارقيه وياك ؟
لو چم يوم هينه .. افراگك يطول

دللول الولد شو نمت عطشان
خاف اتفز لان متغير المچان
غطاك التراب .. شبيك بردان ؟
چف الصوّبك يا ريته مشلول

دللول الولد .. ميت واحاچيك
كرهت السكته واشتاگيت اناغيك
عسه الجرح البنحرك بيه مو بيك
ونعش امك بچفك كونه مشيول

احمد هادي الشمري
بغداد
07714233666

احسنتم وفقكم الله لكل خير وبارك الله فيك