[واثق العيساوي]

((حلم سچين))

مسكين الجرح نامت بصدرة الآه
وبطور الدمـــــــــــــاء تفيض انغامة
يرسم بالنزف لــــوحة الم ودموع
واشوف الدم اثر بجــــــفوف رسامه
قنعته شكثر كلمـــــــــا اريدة ينام
يفز لو مر( حلم سچين) كـــــــــدامه!
تركني وي الفرح رفكة حمامه وذيب
جرف متبوس خدة شفاف البلامـه
وحدة من الثنين وعطش بيه الراي
لو اموت الجرح؟لو اذبح احلامـه!
واكول تهون باجر,حلم صح سكران
تجي صحوة صبح وتثبت اقدامـه
تجي صحوة صبح,بس مااريد السيف
يسجد بالغدر والمسجد ال هامه
ولااريد الكشف عورته كبال الناس
لمن صوت الشجاعه يهلهل حسـامه
عراق شكبر قلبك حيرتني بهاي
حجر طاحن دموعي او وجنتي جامـه
لكيت الضاك خيرك, عابد السجين
واجة الركبة اولادك اشهر اسلامه!
على ظهرك اريد الليل جبّة يصير
ويغزل من سوادة الراسـك عمامـة
واشوفاً اثرطلقة بجسمك التعبان
ويسالوني واكلهم مو جرح شامه!
بكصيبة ام لكيتك,كبل جانت ليل....
نيازك شيب بيهه وتلمع اسهامه
فوك اوراق شاعر..ميت من زمان....
نعم ميت ولكن عايشة اقلامـه!!
على شفايف طفل يركص بوجهه العيد
بحضن مرجوحة كعدت تلعب احلامه
على كذلة عروس وقاط ظل تذكار
من عريسهه الزفــــــــوه لاعدامه
بغيرة فارس العاشك ظهور الخيل
وعطر عرضة العفيف يفوح بلثامه
اشوف عيونه جدحت بالسمه من الغيض
وغيم اسود يغير ويرعد الجامه
على متونه تهب نيران من ينغاض
صلب صدر الصخور يذوب كدامه.

((واثــــق العيــــــساوي))