وهذه القصيده مكتوبه
غدار يابويه الدهر
خافنّه يطول هالسفر.....غدار يابويه الدهر
وابكه وِحيده بمنزلي .....واتنَطر جيتكم هلي
واترجه من عدكم خبر .....غدار يابويه الدهر
,,,,,,,,,,,,,,,,,,,,,,,,,,,,,,,,,,,,,,,,,,,,,,,,,, ,,,
من هَم إحسين إعلى السفر ونيّته صارت كربلا
ورجّب إعله متون الضَعَن اطفاله وعياله وهله
وعاف العليله بياوضع يقبّلهه وهي تقبّله
ضمهه بحنانه للصدر ودمعاته إعله الخد هامله
تلاكت دمعتهه بدمعته..... لمن حضنهه وحضنته
حست إبهليله خطر.....غدار يابويه الدهر
,,,,,,,,,,,,,,,,,,,,,,,,,,,,,,,,,,,,,,,,,,,,,,,,,, ,,,,,,
خلوني ابتالي الضعن وياكم امشي ياهلي
اخدمكم بطول الدرب ويرتوي منكم منهلي
سفرتنه وبعيد الدرب كللهه وردي لمنزلي
إنحيله وعِليله واصبري وباجر اوديلج علي
خافني ماشوفك بعد..... وياخذك من عندي الوعد
وباجر يابويه لو ضهر.....غدار يابويه الدهر
,,,,,,,,,,,,,,,,,,,,,,,,,,,,,,,,,,,,,,,,,,,,,,,,,, ,,,,,
شنتظر وادري بهلدرب لا ماتصح منه رجعه
كالت لبوهه وحاجته بياحاله وهي التودعه
وموج الدموع إعله الوجن ودمعه التلاطم وي دمعه
خليلي عبد الله وِنِس ويضويلي بليلي شمعه
خافنه وياكم ينجتل .....ومن عدكم يخله هالنزل
والسهم يكطعله النحر.....غدار يابويه الدهر
,,,,,,,,,,,,,,,,,,,,,,,,,,,,,,,,,,,,,,,,,,,
راح ارد وعيوني إتهَمِل احمر دمعهه من يصب
ونار الفراك الوجرت اشيطفي نيران القلب
ولو جلجل الليل واجه بياقلب لديارك اطب
وانتظر كل عمري اضل مشبوحه عيوني إعله الدرب
واشد الرايح واجه .....واتربه من عدكم رجه
بلجن يوافيني ويسر.....غدار يابويه الدهر
,,,,,,,,,,,,,,,,,,,,,,,,,,,,,,,,,,,,,,,,,,,,,,,,,, ,,,,,,,,,
صوت العليله فاطمه بجّه الوحوش البلبيد
من طوح الحادي وحِده بضعن الاهل سار بعيد
لابيهه تِنكُل للجدم ولاتكدر توميله بأيد
نوح الحمام الماسِجَن ونت إقليبي المتهيد
مثل الحمام الماسِجن.....ليلي ونهاري من اون
وجفوني ذبلهه السهر.....غدار يابويه الدهر
,,,,,,,,,,,,,,,,,,,,,,,,,,,,,,,,,,,,,,,,,,,,,,,,,, ,,,
ريت المنيه كربت وضماني بذراعه الكبر
كبل الفراك ومحنته ريت افكدت انه العمر
ولاشفت الحسين وهلي عن عيني ياخذهم سفر
واكضي الليالي بالهضم بالحزن بالهم بالقهر
واطبك نهاري وليلتي .....وانحب واجر بعبرتي
وراح اكظي بالنوح العمر.....غدار يابويه الدهر
,,,,,,,,,,,,,,,,,,,,,,,,,,,,,,,,,,,,,,,,,,,,,,,,,, ,,,,,,,,,,,,,,,,,,,,,,,,,,,
قاسم هندي السماوي
العرض العادي
