[** مسلمة سنية **]

خبرتكم انو بعد ما طلع زوجي على شغلو حسيت اني لسا بدي احكي مع حد بالموضوع ... فرفعت سماعة التلفون و اتصلت على اختي ...... بعد السلام و الكلام العادي بديت بالموضوع و خبرتها اني بحاجة الها بموضوع و بدي منها تساعدني فيه لكن بدون ما تخبر اهلي و يكون الموضوع سر بينا .... لأنو والدي متشدد في هاد الموضوع .... و والدتي عرفت اني بقرأ في منتديات الشيعة و وصتني كتير اني ما اتأثر فيهم ( من مبدأ انهم مسلمون و نحن لا نعاديهم و ان الله يحاسبهم اذا اخطأوا لكن لازم نضل بعاد و ما نتأثر بعقيدتهم ) .... المهم اختي وافقت ... فخبرتها اني لسا بقرأ في منتديات الشيعة ... فجاوبتني انها حاسة هيك .... نقاشي معها كان طويل و معقد اكتر من نقاشي مع زوجي يمكن لأنو كان عالتليفون و مو عارفة ارتبو ..... ( اعذروني ازا ما كان الموضوع مرتب رح احط جزء من النقاش ) ... المهم حاولت ابدأ معها بحديث سلمان الفارسي رضي الله عنه ...... فأجابتني بنفس جواب زوجي انهم مسلمون و لما لا .... و عندها اخبرتها : ليش ما بنتعرف على عقيدتهم مش ممكن يكونوا هم الصح .... و نحاول ما نتعصب لمذهب معين ....

طبعا جاوبتني : ما في تعصب لكن في عندهم افكار كتير غلط ......
قلت : في كتير حكي بينحكى عنهم و هو غلط .... يعني هم ما بيرفعوا منزلة علي كرم الله وجهه على منزلة سيدنا محمد عليه و على آله اشرف الصلاة و السلام .... هما بيحكوا انو علي ولي الله .....

هون كانت صدمتي .... ردت اختي : طيب وين المشكلة هو ولي الله و حبيب الله ما في مشكلة لكن عندهم افكار كتير غلط .....

اتذكرت كلام والدتي في نقاش معها لما خبرتها انو الشيعة بيحوا انو علي ولي الله و ما بيرفعو قيمته على قيمة رسول الله محمد صلى الله عليه و آله و سلم .... فأجابت امي هناك الكثير من اولياء الله الصالحين لكن سيدنا علي لدينا قيمته اعلى من اولياء الصالحين ......

يعني هما فاهمين انو كلمة ولي الله تعني رجل صالح و ليس امام يجب ان يتبع و يقتدى به ..... عدت الى جملة اختي الأخيرة ..... فأجبتها : طيب احنا بنتعرف على مذهبهم ازا وافق فطرتنا كان به .... و الا رح نثبت اكتر على مذهبنا و نكون عرفنا اكتر عنو ..... و بعدين مزبوط في كتير اشياء بنشوفها غلط لأنو اكيد في عندهم علماء بيغلطوا متل ما في عند السنة علماء بيغلطوا و البشر خطاءون ..... احنا بنشوف اساس المذهب و بعدين بنبني عليه ......

ردت علي اختي : يعني شو الأساس !!!!
: متل ان نعرف عن الأئمة مش يمكن فعلا في 12 امام و لازم نعرفهم سألتني من وين جبت الحديث .
: خبرتها بمتل ما خبرت زوجي ....
: طيب بدك تعرفي اسمائهم ؟؟؟
: عرفت اسماءهم عند السنة و عرفت اسماءهم عند الشيعة .
ما بعرف كيف احتد النقاش و فوتتني بموضوع الشيخين ......
قالت : يعني انت بتحكي انو خلافة ابو بكر باطلة و قد اجمع عليها المسلمون .... بما فيهم سيدنا علي
: بس سيدنا علي ما كان موافق عليها و كان معو مجموعة من المسلمين
: من وين جبتي هالكلام ...
جاوبتها انو في روايات في الصحاح بس ما تذكرت وين بالزبط لأني ما كنت اسجل .....
: رح ادور في صحيح البخاري و اشوفلك ...
: بس مو كل شي بالصحيح موجود !!!!!
احتد النقاش اكتر و صارت تذكرلي مناقب الشيخين من الصحيح ثم تراجع نفسها و تقول لي هلا بتحكي انو هاي الروايات من الصحيح ....... اتضايقت و هي بتحكي هيك لأني ما بحكي انو احاديث الصحيح خطأ ..... لكن بحكي انو ممكن كاتب الصحيح - رحمه الله – مع جهده الكبير لكنه انسان و الرواة ايضا بشر اذا ممكن يحتمل الصواب و الخطأ ..... المهم ما بعرف ضايقتني اختي اكتر بموضوع الشيخين و حشرتني بالأسئلة : هلا انتي بتحكي انو سيدنا ابو بكر اخد الخلافة من سيدنا علي ... طيب كيف بتترضي عليه !!!!! ( انا بعرف انو هالشي انتو كمان رح تحكوا بس رجاءا ما تفوتوا معي بموضوع الشيخين و زوجات الرسول عليه و على آله اشرف الصلاة و السلام على الأقل بالوقت الحالي .... )
اختي كان فكرها تحشرني بهالزاوية من منطلق اتراجع عن فكرة انو الخلافة كانت من حق سيدنا علي كرم الله وجهه ..... ما بتعرف اني تعمقت يمكن اكتر من اللزوم و عندي صورة معينة مع انها لسا مشوشة ..........

جاوبتها : انا ما بنكر فضلهم لكن في هاي غلطوا و هم بشر و العلم عند الله و رأيي فيهم متل رأي سيدنا محمد صلى الله عليه و آله و سلم و متل رأي سيدنا علي و ابناؤه فيهما ....
ردت : طيب ليش و كيف سيدنا علي كرم الله وجهه سكت و بايع الخلافاء الثلاث قبله ؟؟؟؟

ما عرفت اجاوبها !!!!!!! مع انو كان عندي بعض الاجابات لكنها ما كانت واضحة الي فكيف بدي اوضحها الها ...... و غير عن هيك حسيت حالي كتير مضايقة و بدي انهي المكالمة ..... فطلبت مني ما انجرف زيادة و انو لازم تشوفني احسن ......... بصراحة بدل ما انفس عن حالي بعد مكالمتي معها اضايقت اكتر ..... حسيت اني بالنص ....... ضميري مأنبني يمكن اكون فعلا انجرفت كتير و تسرعت في حكمي على الوقائع و ببتعد عن الحق ...... و كمان خايفة يكون الطرف التاني هو الحق و لازم اعرف اكتر و اتوجه له .......... بجد كتير مضايقة ...... ربنا ينور بصيرتي و يهديني و كل مسلم للحق ...... اللهم آمين

اللهم ارني الحق حقا و ارزقني اتباعه و ارني الباطل باطلا و ارزقني اجتنابه ....

رجاءا من كل من يقرأ الموضوع ان لا يدعو لي بالتشيع او بالبقاء على مذهب السنة بل ان يدعو لي بالهداية