[مرتضى العاملي]

شفتك يالبدري مو حزين
لكن انت حزين
مثل بلبل كعد متأخر
لكه البستان
كله إبلايه تين
مثل صندوك العرس
ينباع خردة عشك
من تمضي السنين

***
يجي يوم إنلم حزن الايام
وإثياب الصبر
وإنرد لهلنا
يجي ذاك اليوم
لجن آني خايف
كبل ذاك اليوم
تاكلني العجارب
***
يجي ذاك اليوم
وإذا ما جاش
إدفنوني على حيلي
وكصتي للنجف متوجه

****

ياطير وصل للبدري
مني سلام وشوك
كله الشِعر يا بو تركي
الصايته ايلوك
ياملح شِعر العرب
يلشَعر راسك شلب
سافر إبجسمك سفر
وروحك تظل ياوفي
مشتوله وي الكصب

***
ياطير من ينذبح يجفل
يغرّد تعب
يسـَكت إغراب النعب
رفة إجناحك سحر
رفة إجناحك شعر
عندك قصايد نوك
عندك فخاتي شجن
عَ النجمه غنن فوك
عَ النسمة ناحن شوك
***
آنه ارد اروح لابو تركي
ماروح انه الغيره
وأحجيله
صارت صدك
وباعوني إبليرة
والليره طلعت شبه
وإشتعلت الحيره
والناس تنطر للبدري
يرجع بريل السعد
محمّل أشعار ورد
ويكحّل الديره
آنه ارد أروح لابوتركي
ماروح أنه الغيره
***
ياطير وصّي ابوتركي
خل يطوي ليل السفر
ويجمع تصاويره
يا طير شنهي العذر
ماتعباه السفر ..
وهوَّ بجحيل العمر
والدنيه فريره
***
ياطير بلكت تمر
توصّل سلام الِشعر
وبوساتنه إبكجه
ياطير انشد لبو تركي
ياساحر الحِسجه
يا طير لا تشتمر
إضلوعي الك عشة
***
( يا طير غني بقهر
غنوة عشك يا طير
هودر هواهم ولك
حدر السنابل كطه)
ياطير خاف إتعَثر
بخيال ذيب السِطه
اليحوف نص الليل
ياطير حّمل نده
من هور اِلغموكه
وإخذ الجفن لو رحت
سويه غلك فوكه
وضم النده والدمع
الحوشيه لتبوكه
***
الشعر عندك وطن
والوطن عندك شعر
الوطن عندك جرح
الشعر كمر الصبح
والشعر كيمر ملح
عالناس خضر ضوه
فتّحت باب الِشعر
خليته يشتم هوه
حسيت بيه مخنوك
خاويته من الزغر
وكل ساعه بيه محروك
الشعر عندك شعر
يجري بسواجي الفجر
وعد غيرك اصبح سوك
***
يابدري هلبت تمر
ويشتعل بينه الحيل
وإنرد ندك اكهوه
ويرجع يشمنه الهيل
مر بينه مره يابدر
وصافح صبحنه اريوك
ياطير بلغ اخونا البدر مني سلام وشوك
مني سلام
وشووووووووك

تحيااتي لاخي البدري

على وزن قصيدة ياريل لمظفر النواب
خليته الك