[زهرة الفردوس]

اللهم صلّ على محمد وآل محمد وعجل فرجهم الشريف

اليوم راحوا كل هلي

اليوم راحوا كل هلي ............* وما ضلت خيام
وين أخوي حسين وينه ............* حرقوا خيمنا علينا
حرت بين العائلة ............* وما بين الأيتام
اليوم راحوا كل هلي ............* وما ضلت خيام

طلعت أم الحزن زينب گابعه بثوب المصيبه
تگوم نوبه ونوبه تعثر بين الأجساد السليبه
صاحت وصيحتها ظهرت من گلب شاجر لهيبه
وين اليحضرون الشدد للعائلة ما ضل سند
يا أهل الشيم خدري انفگد
راح خدري من اين اجيبه
وين أروحن يا هلي وانطي الوجه وين
عگب عزتنا انولينا حرگوا خيمنا علينا

اليوم راحوا كل هلي ............* وما ضلت خيام
وين أخوي حسين وينه ............* حرقوا خيمنا علينا
حرت بين العائلة ............* وما بين الأيتام
اليوم راحوا كل هلي ............* وما ضلت خيام

تگوم من يم جسد تگعد يم جسد والگلب يسعر
التفتت بدمعتها شافت جسم فوگ الثرى موذر
اجت واتگربت يمه لنها تنظر علي الأكبر
يم جسمه طاحت عالثرى طاحت ومدمعها جرى
بيا عين جسمك أنظره مترب مخضب معفر
اش لون يا الأكبر تظل فوگ الثرى اش لون
ما دريت اش صار بينا حرگوا خيمنا علينا

اليوم راحوا كل هلي ............* وما ضلت خيام
وين أخوي حسين وينه ............* حرقوا خيمنا علينا
حرت بين العائلة ............* وما بين الأيتام
اليوم راحوا كل هلي ............* وما ضلت خيام

عافت الأكبر وراحت يم جسم جسام تنحب
تنادي يا عريس چفك من دما المنحر تخضب
مثل ما سلبوا جسمك خدري يا جاسم تسلب
ناديتك بصوت الدمع ليلة زفافك منصرع
يا جاسم ونار الشمع ضلت بدلالي تلهب
هذا ليل الفاجعه موحش يا جسام
بس حرم بالطف بگينا حرگوا خيمنا علينا

اليوم راحوا كل هلي ............* وما ضلت خيام
وين أخوي حسين وينه ............* حرقوا خيمنا علينا
حرت بين العائلة ............* وما بين الأيتام
اليوم راحوا كل هلي ............* وما ضلت خيام

عافت العريس مرمي وگامت بحنية ضلعها
شافت أم الطفل تبچي وعالمهد يجري دمعها
اجت يمها وشاركتها بنوحها وهمها وفزعها
عالمهد محنية ظهر حايره ودوهنها الدهر
صاحت يا مگطوع النحر مصابك لأمك فجعها
بالمناحه وبالحزن صاحت يا مذبوح
ريت للطف لا اجينا حرگوا خيمنا علينا

اليوم راحوا كل هلي ............* وما ضلت خيام
وين أخوي حسين وينه ............* حرقوا خيمنا علينا
حرت بين العائلة ............* وما بين الأيتام
اليوم راحوا كل هلي ............* وما ضلت خيام

النوب راحت للشريعه تصيح يا عباس وينك
الدهر وسفه يا چفيلي حال بين اختك وبينك
ريت سيف الگص يمينك گص يميني ولا يمينك
بغيبتك يا راعي العلم عامود صيواني انهدم
يا خويه يا ريت السهم صاب عيني گبل عينك
هذه نار مخيمك تسعر يا عباس
والخدر راح من ايدينا حرگوا خيمنا علينا

اليوم راحوا كل هلي ............* وما ضلت خيام
وين أخوي حسين وينه ............* حرقوا خيمنا علينا
حرت بين العائلة ............* وما بين الأيتام
اليوم راحوا كل هلي ............* وما ضلت خيام

نسألكم الدعاء