[آمال يوسف]

بمناسبة عيدها .. المرأة الوحيدة التي أعرفها .. اليها ولكم هذه القصيدة

أمـــــــــي :-

على عمري الّي عشته وكبرتي ويه الناس
لجن من عطف أمي جني ماشابع

إذا ساعة تأخرت إعله طبت البيت
ألكه أمي الحنينه لازمه الشارع

أجي بس من بعيد ألكه سواده تلوح
أوصل ألكه أمي واكفه تباوع

سبع إخوان وآنه الثاني بالترتيب
جان شسوت أمي لو جنت سابع

تفرح عيد عدهه من أضل بالبيت
لجنهه تنحني من جلمة الطالع

ياواسع الرحمه عكب كلبك ذاك
عفه كلب أمي يارب شكثر واسع

ردت وياهه أحطن روحي بالميزان
لكيت إبينهه وبيني الفرق شاسع

أمي الجنه إلهه وأنه شما صليت
إذا أكللهه أف ما أنحسب راكع

وعلى الماكو ربيت وربه وياي العوز
وكلما ألتفت ألكه الفقر يمي

لجني أشبع جنت وأنسه مرار الجوع
من يمر بذاني صوت من أمي

أمي البيت كله وريحة أهل البيت
وهيه العجنت إسم حسين وي دمي

جانت تنسه همهه وتنسه كل الناس
بس مايوم أتذكر نست همي

وإذا علفضل أحجي أمي أولى الناس
أمي الفضل من راسي لحد جدمي

إسمي على إلساني جنه ماموزون
بس بلسان أمي ينوزن أسمي

أنه من كبل هذي ماكتبت إعليج
وأنه خجلان منج والخجل يعمي

بس صدكيني أوصي كل قصيده إعليج
أكللهه بحنين الوالده إتوسمي

يوم الما أشوفج جني ماموجود
ولا محسوب يوم وجن جرح يدمي

ياعلمي الدرسته موش عن إستاذ
أنه من بحر حنيتج خذت علمي

ياجنة الباري الهوت عد رجليج
إخذي إعيوني خلي بحضرتج تهمي

يالحن القصيدة وفحوة الأبيات
تهوه الدنيا كلهه وعالي إسم إمي


بقلم شاعر كربلاء الشاعر :: فراس الأسدي ::